महिला दिनासाठी महायुती सरकारकडून खास भेट! 'लाडकी बहीण' योजनेचे दोन महिन्यांचे पैसे एकत्र

NewsZenn Mar 3, 2025 270 0

महिला दिनानिमित्त महायुती सरकारकडून महिलांसाठी आनंदाची बातमी आली आहे. 'लाडकी बहीण' योजनेअंतर्गत फेब्रुवारी आणि मार्च महिन्याचा हप्ता 8 मार्च रोजी एकत्र मिळणार असल्याची घोषणा मंत्री आदिती तटकरे यांनी केली आहे.

ही योजना राज्यातील पात्र महिलांसाठी लागू असून, त्यांना दरमहा 1500 रुपये मिळतात. मात्र, फेब्रुवारी महिन्याचा हप्ता वेळेत मिळाला नव्हता. त्यामुळे अनेक लाभार्थी महिलांना पैशांची प्रतीक्षा होती. आता सरकारने हा हप्ता महिला दिनाच्या विशेष दिवशी देण्याचा निर्णय घेतला आहे.

मंत्री आदिती तटकरे यांनी सांगितले की, काही अर्ज अपात्र ठरले आहेत आणि काहींनी स्वतःहून अर्ज मागे घेतले आहेत. राज्यातील विविध जिल्ह्यांमध्ये छाननी प्रक्रियेदरम्यान 7 लाखाहून अधिक महिलांना अपात्र ठरवण्यात आले. यामध्ये संजय गांधी निराधार योजनेच्या लाभार्थी, 65 वर्षांवरील महिला आणि इतर शासकीय योजनांचे लाभार्थी असलेल्या महिलांचा समावेश आहे.

महिला दिनाच्या दिवशी लाडक्या बहिणींना महायुती सरकारकडून मिळणाऱ्या या आर्थिक मदतीमुळे त्यांना दिलासा मिळणार आहे. महिलांच्या आर्थिक सक्षमीकरणासाठी सरकारने हे महत्त्वाचे पाऊल उचलले आहे.